音樂治療 vs. 音樂教育

我哋啱啱做完咗兩個幼兒音樂治療小組課前講座，加上工作需要，我哋嘅治療師們都因此呢期同家長們多咗接觸，而傾談當中家長們都不約而同咁問到同一個問題：
究竟音樂治療同普通學音樂有咩唔同？我點樣知道音樂治療啱唔啱我嘅小朋友？
音樂治療係以音樂作為工具，經過評估後因應受助者嘅能力去制定治療方案，以音樂去幫助受助者學習佢需要嘅技能，例如社交、專注力等等。學習音樂就係以一門藝術咁嘅形式去學習同認識音樂。相比起學習音樂，音樂治療係比較以人為本，治療師會因應為受助者制定咗嘅治療目標而設計不同類型嘅音樂體驗，可以包括唱歌、音樂律動、音樂即興、音樂創作等等，喺成功導向嘅大前提之下給予受助者唔同嘅機會同模式參與音樂體驗，發揮潛能同時亦引導受助者作出不同嘅嘗試，從而掌握佢需要學習嘅技能，所以係個過程主導嘅治療模式。以一門藝術咁學習音樂通常都係課程為本，學習音樂技巧、修養、美感同完整性為主，係相對比較成果主導嘅學習。
咁究竟點樣嘅表現先叫做適合音樂治療呢？
因為音樂冇入侵性同冇威脅性，而且大部份人都喜歡音樂，我哋相信只要治療師能夠搵到受助者喜歡嘅音樂，營造到好嘅治療環境同埋同受助者建立到好嘅治療關係，音樂治療係適合大部份有需要嘅人士嘅。不過，我哋音樂治療師都需要講到，的而且確有一啲人係比較適合接受音樂治療嘅：
如果音樂加諸到呢個人嘅生命裡面係會令到佢有改變，音樂可以成為佢改變嘅動力，音樂治療就係適合佢嘅治療模式啦
即係點呢？用小朋友做例子：如果小朋友平時好難專心，但係聽到音樂會坐得定啲嘅；或者小朋友平時社交或者說話比較弱，但係聽完音樂會跟著唱或者會講返歌仔裡面啲嘢嘅，呢個就係我哋所講嘅「加咗音樂有改變」啦。
註冊音樂治療師加多句：搵我哋幫手唔一定要社福或者醫療轉介架！自己搵我哋都得架～如果覺得音樂治療師嘅專業係可以令到受助者改變及發揮潛能，提升生活質素嘅話，不妨同我哋傾吓偈，讓我哋可以制定適合受助者嘅治療方案。
.
.
.
.
.
FB: icat2014
IG: @icathk_
YouTube: ICATHK
www.icat.com.hk
[email protected]
#icathk #icathk2020 #香港創意藝術治療中心 #musictherapy #音樂治療 #註冊音樂治療師 #credentialedmusictherapist #音樂教育 #音樂教育工作者 #以人為本 #課程為本 #過程主導 #成果主導 #專注力 #社交 #唱歌 #音樂律動 #玩奏樂器 #音樂即興 #音樂創作 #音樂美感 #音樂技巧 #音樂修養 #發揮潛能 #治療目標 #治療關係 #提升生活質素 #轉介 #香港 #網上 #實體