為咗令更多小朋友唔會因為停課而無相應嘅服務,我哋中心自去年9月開始都加開多咗時段做實體小組同個別 #音樂治療服務,希望有需要嘅小朋友能夠接受適切同無間斷嘅治療服務。喺收生過程當中,好多家長都會基於種種原因而問:「有冇得試堂呀?」
我哋明白到坊間好多興趣班 (尤其學習藝術) 都有試堂呢個「服務」,但係#音樂治療 同其他 #專職治療 一樣,都係冇「試堂」呢個慣例嘅。你可能會問「點解呀?」,除咗因為音樂治療唔係學習音樂嘅興趣班之外 (之前嘅post已經講過音樂治療與音樂教育嘅分別~),其實仲有更大嘅原因架!咁喺解釋呢件事之前不如就講解下音樂治療嘅過程畀大家認識下,咁你就會明白點解音樂治療同其他專職治療都冇「試堂」啦。 音樂治療同好多專職治療一樣,都係一個「#以人為本」嘅助人專業-我哋會因應受助者嘅需要,透過不同音樂體驗而幫助受助者達到所訂下嘅 #治療目標,從而提升受助者嘅生活質素。所有專職治療嘅療程都離唔開 #臨床評估,#制定治療目標,#提供治療,以及 #成效評估 呢4個過程,音樂治療亦都一樣:喺受助者接受治療之前,#音樂治療師 都要為受助者作臨床評估,而音樂治療嘅評估唔係拎住個清單剔剔剔咁㗎喎,而係喺治療師為受助者度身訂造嘅不同音樂體驗當中進行嘅。因為音樂治療係採用「成功導向」嘅治療模式進行,所以治療師除咗會用音樂喺唔同範疇為受助者作評估之外,亦會因應受助者嘅能力當下調節 #音樂體驗,令受助者能夠成功地參與。 好多時候小朋友第一次嚟到治療,因為所有嘢都係新,所以表現未必會係最真實。治療師會同小朋友以音樂建立治療關係,希望「暖場」嘅同時能夠提升小朋友對治療環境嘅信任同喜愛,令小朋友可以放鬆參與,表現最自然最真嘅一面俾治療師睇。呢個建立關係嘅過程係由小朋友踏入治療室就開始,但係基於陌生環境,一節嘅時間通常都唔足夠完全令治療師同小朋友嘅關係建立得好鞏固。就憑小朋友一節嘅表現,治療師比較難去作好精準嘅評估之餘,小朋友亦未必有足夠嘅時間同機會去同治療師相處,以致未必能完全投入參與各種音樂體驗。如果以小朋友一堂時間嘅表現去「試」小朋友啱唔啱/喜唔喜歡呢個治療模式,喺冇俾足夠嘅機會小朋友同治療師互相認識相處並投入治療嘅情況下,未免對雙方都唔係好公平嘅。 正因為「試堂」喺建立治療關係嘅過程係完全無幫助,對受助者亦無益處,所以喺「以人為本」嘅專職治療世界裡面係冇「試堂」呢個慣例嘅,音樂治療當然都唔例外啦。 其實治療師好明白家長好關心小朋友嘅進度,好驚為小朋友揀錯治療,所以會想試下睇下「啱唔啱」先作「長線投資」。但係治療係一個過程嚟嘅,家長需要俾啲空間小朋友同治療師一齊工作先有機會睇到成效架! ===== 我哋嘅1-2月實體同網上音樂治療小組現正招生 查詢及報名:+852 6510 9405 . . . . . FB: icat2014 IG: @icathk_ YouTube: ICATHK www.icat.com.hk info@icat.com.hk #icathk #icathk2021 #musictherapy #creativeartstherapy #香港創意藝術治療中心 #助人專業 #治療關係 #治療環境 #音樂治療 #音樂體驗 #以人為本 #治療服務 #成功導向 #臨床評估 #治療目標 #治療 #成效評估 #試堂 #受助者 #兒童音樂治療 #香港
0 Comments
Your comment will be posted after it is approved.
Leave a Reply. |
Our bi-monthly blog to keep you up-to-date with our latest happenings! Archives
September 2021
Categories
All
|