音樂治療樂器與目標

嚟到2020年最後一個月，本來以為會靜下來嘅疫情又出現反彈，好多實體班被逼要煞停。但係時間係唔等人嘅，需要服務嘅小朋友進度不能停下，所以好多音樂治療師再次將服務搬到網上，希望為有需要兒童及家庭繼續提供適切及不間斷嘅服務。

參加網上音樂治療服務之前，家長都會問到：咁我屋企冇你哋中心咁多樂器喎，小朋友點樣參與呢？

不如就趁呢個機會介紹吓治療師常用嘅樂器/道具，可以用佢哋達到咩治療目標，同埋點樣可以喺家居搵佢哋嘅「代替品」啦～

1）鼓
鼓係音樂治療師喺音樂治療中經常會用到嘅樂器之一。鼓樂喺音樂治療當中通常都極度受歡迎，因為樣子吸引，而且一敲就有聲，非常容易操作。音樂治療師利用鼓可以幫助小朋友喺音樂體驗中達到以下治療目標：
提升 #有意義參與 Purposeful participation
提升 #掌控能力 Impulse control
提升 #手眼協調能力 Eye-Hand coordination
提升 #專注力 Focus and attention
提升 #社交能力 (包括等候，輪流) Social skills (waiting/turn-taking)
提升 #情緒管控能力 Emotion regulation
如果屋企冇鼓，可以利用家居嘅膠盒或者鐵罐敲打，又或者比較厚啲嘅書本，都可以做到相類似嘅效果架～

2) 沙鎚
沙鎚係另外一樣音樂治療師常用嘅樂器。同鼓一樣，佢嘅操作非常簡單，所以喺音樂治療裡面好受歡迎嘅。沙鎚有分唔同大細、顏色、形狀等，搖出嚟嘅聲音亦都會因為佢嘅大細同「餡」唔同而有所唔同，所以都係搶手樂器之一。喺治療當中，音樂治療師利用沙鎚可以幫助小朋友喺音樂體驗中達到以下治療目標：
提升有意義參與 Purposeful participation
提升 #大小肌能 Gross and Fine motor skills
提升手眼協調能力 Eye-Hand coordination
提升社交能力 (包括等候，輪流) Social skills (waiting/turn-taking)
提升 #認知 (顏色，數字，類比等) Academic skills (color, counting, comparing)
提升 #遵從指令能力 Direction following
屋企絕對可以自己自家製沙鎚架！搵個樽/盒再放啲細嘅食材或者珠仔入去，再封番埋個口就得架啦。不過要記得留返啲空間呀，如果唔係就冇空間俾啲嘢喺個樽/盒度郁，咁就點搖都冇聲架啦。

3) 響木
響木可能喺音樂治療師嘅樂器包裡面未必好似鼓或者沙鎚咁一定會有，但都係治療師常用嘅樂器，因為佢方便攜帶，而且容易發聲， 都頗為小朋友歡迎嘅。喺治療當中，音樂治療師利用響木可以幫助小朋友喺音樂體驗中達到以下治療目標：
提升有意義參與 Purposeful participation
提升掌控能力 Impulse control
提升手眼協調能力 Eye-Hand coordination
提升專注力 Focus and attention
提升社交能力 (包括等候，輪流) Social skills (waiting/turn-taking)
提升認知 (數字) Academic skills (counting)
提升遵從指令能力 Direction following
喺屋企自製響木其實好簡單：如果有木筷子 (兩對會好啲) 互相敲打就已經係啦～或者兩枝筆互相敲打都有相同效果。

​4) 絲巾
絲巾唔係樂器，但係音樂治療師常用嘅道具，因為佢輕而且顏色/圖案鮮艷，吸引到小朋友之餘可塑性高，喺音樂律動作道具就最啱喇。喺治療當中，音樂治療師利用絲巾可以幫助小朋友喺音樂體驗中達到以下治療目標：
提升有意義參與 Purposeful participation
提升大小肌能 Gross and Fine motor skills
提升手眼協調能力 Eye-Hand coordination
提升認知 (顏色，數字，類比等) Academic skills (color, counting, comparing)
#放鬆 Relax
屋企如果本身有絲巾就最好啦，如果唔係嘅話用毛巾都可以架。如果都無，紙巾其實都有相類似嘅效果嘅。
希望以上嘅資訊除咗可以讓家長知道音樂治療師喺治療當中點樣用樂器/道具達到治療目標之餘，亦俾到啲頭緒家長喺參與網上音樂治療服務嘅時候點樣幫助小朋友準備啦。其實加啲心思同創意，任何地方都可以充滿音樂㗎
.
.
.
.
.
FB: icat2014
IG: @icathk_
YouTube: ICATHK
www.icat.com.hk
[email protected]
#icathk #icathk2020 #香港創意藝術治療中心 #音樂治療 #註冊音樂治療師 #網上音樂治療 #音樂治療目標 #音樂治療樂器 #音樂 #musictherapy #幼兒網上音樂治療 #玩奏樂器 #音樂律動 #即興創作 #唱歌 #音樂治療服務 #家居 #音樂體驗 #社交溝通 #自我表達 #專注力 #治療