小組係幾多人架？

繼上一個post提及到對音樂治療服務有興趣嘅人都會問我哋音樂治療師究竟佢哋適合參加個別定小組治療後，另一個我哋成日俾人查詢嘅問題係：小組模式嘅音樂治療裡面治療師可以對幾多個受助者呢？
喺音樂治療小組裡面一個音樂治療師可以對幾多人其實係無固定答案嘅～我哋明白到好多時候機構都會覺得既然開組，就會想個小組開大啲，令到多啲服務使用者受惠。作為治療師，我哋固然想令多啲服務使用者受惠啦，但係同時我哋都需要衡量究竟小組嘅大小會唔會影響到受助者得到嘅幫助以及小組嘅運作。太大嘅組會令參加者比較難與音樂治療師建立治療關係，令佢哋對小組缺乏信任及安全感，以至不能喺治療當中投入參與，直接影響治療效果。有一啲小組嘅參加者會需要多一啲治療師嘅關注，如果小組參與人數太多，治療師就無辦法照顧到每一位參加者嘅需要，小組嘅治療效果就會因此降低，導致得不償失。
總括嚟講，音樂治療師喺一個小組可以對幾多人完全係取決於參加者嘅需要及能力，而除非開小組之前已同治療師溝通過小組係開放模式 (open group)，我哋會建議小組開始後盡量保持參加者人數及名單，令小組可以在組員感到安全及互信嘅環境下順利進行。
喺「新常態」嘅呢段時間，參加音樂治療有咗多一個選擇，就係喺網上接受服務啦－喺網上嘅服務打破咗地域界限，咁係咪就可以多啲人參加呢？
都係呢一句：一個小組幾多人先最適合係取決於參加者嘅需要及能力嘅，而喺網上可能就有多一個決定元素嘞－利用嘅軟件平台嘅視窗同一時間下可以睇到幾多人呢？音樂治療好多時都涉及到治療師與受助者/受助者互相嘅互動，如果睇唔到或者要喺螢幕掃嚟掃去先見到晒所有受助者，係會有礙小組嘅進行嘅。另外如果好多人一齊喺網上小組玩奏音樂，會好容易有疊聲嘅情況出現，呢個都會有機會影響治療師嘅工作繼而影響治療效果。
關於音樂治療小組運作嘅資料，最好都係同返接洽嘅音樂治療師溝通一下，佢哋了解過後一定會俾到最合適嘅建議你㗎～
.
.
.
.
.
FB: icat2014
IG: icathk_
YouTube: ICATHK
www.icat.com.hk
info@icat.com.hk
#icathk #icathk2021 #musictherapy #credentialedmusictherapists #香港創意藝術治療中心 #音樂治療 #小組運作模式 #新常態 #小組治療 #實體小組 #網上小組 #音樂體驗 #玩奏樂器 #聆聽音樂 #音樂即興 #音樂創作 #註冊音樂治療師 #溝通 #治療關係 #治療目標 #信任 #安全感 #香港 #HongKong #音樂 #特殊需要 #互動