或者你同我都會有同感,今年香港嘅9月同以往嘅9月好唔同 (其實整年都好唔同啦), 但係可能身邊嘅莘莘學子,或者教育工作者體會更深。 以往嘅9月份莘莘學子們都會再次孭起書包,投奔校園生活。早上巴士站著住校服嘅人龍喺呢個月暫時都未再見到,校園裡面學生嘅影子暫時未見到,走廊嘅交談聲音未聽到,聽到嘅反而係老師們為準備網上課堂實時上課或者錄製影片嘅情況,雖然忙碌,卻多咗一份冷清。 早前睇過一個民間嘅訪問片段,問及中小學生對今年開學日嘅感受。同學們都感嘆已經好耐冇返學,雖然返學做功課測驗考試會帶來壓力,但係更掛念嘅係同同學仔嘅相處時間,一起共同努力嘅感覺同喺學校嘅一點一滴,例如去小食部買嘢食,同同學一齊上堂嘅時光,認識新朋友,在堂上與老師及同學交流等等。由此可見,學校唔係淨係一個傳授知識嘅地方,而係好多人製造回憶,建立友誼,盛載情緒嘅地方。 對好多教育工作者嚟講,今年9月都係一個大挑戰:將原有課程搬到網上好多情況本來就係mission impossible, 見唔到學生又係一大難題,尤其是負責升小一/升中一班嘅老師們除咗擔心學生學科上追唔追得上進度外,學習環境轉換帶來嘅相關適應問題,加上唔係每一位學生都能夠有能力配合上網課...壓力比平常學期大嘅同時亦感嘆及掛念可以見到學生面授課堂嘅日子。 家長呢?其實家長喺呢個不一樣的9月都面對不一樣的挑戰。在職家長們需要請假陪同年紀比較小嘅子女上網課;就算唔需要請假陪同上課,家長都擔心子女網上學習能否跟上進度。至於在家嘅父母就感嘆冇咗私人時間:平時子女上學就係佢哋全日當中比較輕鬆嘅時間,而家要安排子女網上學習反而變得更忙。 學生們老師們及家長們所表達嘅呢啲感受,我哋臨床有一個名稱,叫做griefing (哀傷)。當然,griefing都有分程度嘅,而佢哋所表達嘅未必及得上親人離世嗰種哀傷,但係都係表達咗佢哋失去咗一啲佢哋珍惜嘅嘢嘅情感。 作為音樂治療師嘅我哋,可以點樣幫助佢哋抒發佢哋呢啲哀傷嘅情感,改善佢哋嘅精神健康呢? 1) 聆聽音樂
因為聽音樂有減壓及減痛嘅作用,陪伴經歷緊哀傷嘅人聆聽佢哋喜歡嘅音樂有助減低佢哋嘅壓力同傷痛。音樂治療師會帶引佢哋喺音樂當中作放鬆練習,若果許可,待音樂完結嘅時候音樂治療師會邀請佢哋講吓聽音樂/做放鬆練習時嘅感受。 2) 討論音樂 討論音樂嘅題目有好多,例如歌詞,填詞人,作曲人,甚至歌曲題材等等,令經歷哀傷嘅人可以暫時分散注意力,脫離一下,而音樂治療師適當地問相關嘅問題不但唔會令到整個討論過份脫離之餘,更能夠令經歷哀傷嘅人有一個喘息嘅機會。如果遇到合適嘅歌詞作討論,呢個過程更能夠成為自我探索同成長嘅起點添。 3) 創作音樂 音樂治療師會因應經歷哀傷嘅人嘅狀態同能力讓佢哋以不同形式嘅創作表達自己,抒發情感。喺音樂治療嘅創作裡面,因為冇絕對嘅對與錯,所以任何能夠表達自己嘅創作治療師都歡迎之至。 4) 玩奏音樂,唱歌 玩奏同唱喜歡嘅音樂有助減壓同減痛嘅同時,音樂治療師引導嘅唱歌/玩奏音樂體驗更能夠令經歷哀傷嘅人可以暫時抽離一下,沉醉於玩奏音樂及唱歌嘅樂趣當中,令佢哋感到放鬆,暫時將負面情緒放埋一邊,享受剎那間嘅平靜安穩。治療師會喺體驗完結後一齊討論體驗過程,幫助處理情緒。 咁作為佢哋身邊嘅你又可以做啲咩呢? 陪伴或者聆聽其實都係好好嘅方法幫助呢啲朋友抒發佢哋嘅情緒架。Validate (理解/明白) 佢哋有嘅情緒令到佢哋覺得唔係得自己一個,投其所好令佢哋知道佢哋並不孤單。 有需要嘅時候就要搵專業人士幫手啦。 FB: icat2014 IG: icathk_ YouTube: ICATHK www.icat.com.hk info@icat.com.hk #icathk #icathk2020 #香港創意藝術治療中心 #新冠肺炎 #covid19 #不一樣的9月 #停課 #莘莘學子 #教育工作者 #家長 #老師 #學生 #griefing #哀傷 #網上教學 #音樂治療 #註冊音樂治療師 #精神健康 #聽音樂 #討論音樂 #創作音樂 #玩奏音樂 #唱歌 #放鬆 #減壓 #抒發情感 #不孤單
0 Comments
Your comment will be posted after it is approved.
Leave a Reply. |
Our bi-monthly blog to keep you up-to-date with our latest happenings! Archives
September 2021
Categories
All
|